VISITA DE MISIONEIRA

  

María Teresa, a primeira pola nosa esquerda,
co Consello Xeral da súa Congregación.

         María Teresa Andrade, Misioneira de María Mediadora, veu descansar coa súa familia na casa petrucial de Langueirón, en Ponteceso.  Con este motivo ponme ao día da misión por ela fundada en Chezi,  Malawi, misión que desde hai vinte anos veu recibindo apoio solidario de varias familias coruñesas relacionadas co Fogar de Santa Margarida.

     María Teresa fala do proxecto Rainbow e do Centro Saint Mary de Chezi con palabras e entoación sinxelas e humildes, pero vivas e cálidas, convincentes.      

    O lector sabe que Malawi é un pequeno país, veciño de Zambia, Mozambique e Tanzania, cos que comparte as augas do lago Malawi, que lle dá nome. Está entre os estados máis atrasados e máis densamente poboados do continente continente africano. A economía está baseada na agricultura, cunha poboación predominantemente rural. Ten unha baixa taxa de esperanza de vida e moi alta taxa de mortalidade infantil. Por riba, a epidemia da sida é a causa de moitos nenos orfos,  que malamente poden ser atendidos polos seus familiares.  

     A misión onde se levantou o Centro Saint Mary de Chezi acolle nel a 200 nenos orfos, que encontran así fogar, alimentación apropiada e educación. 

     Ademais, o proxecto Rainbow desenvolve desde 1991 un programa de educación e alimentación para máis de mil cincocentos nenos dos poboados veciños, que veñen á escola,  comen e levan tamén o alimento cotián para a súa familia.

      O Centro Saint Mary dispón tamén de campos de cultivo que traballan os propios nenos e os seus coidadores e monitores. Con diversas axudas, instalouse un sistema de regadío, gota a gota, que permite producir os froitos do país así como nabizas, pementos de Padrón, tomates, repolos  e outros produtos galegos, exportados por María Teresa desde Bergantiños e que se adaptaron moi ben ao terreo e clima local. Un fato de cabras andaluzas e un rabaño de vacas cedido por Reny Picot completan o milagre cotián de Santa María de Chezi, equilibrando a alimentación co aporte de carnes e derivados lácteos.          

     A visita de María Teresa Andrade reforza a miña íntima e personalísima satisfacción de ser e sentirme católico.