Evanxeo do Domingo XXIX do Tempo Ordinario (A) 16/10/2011

Evanxeo segundo Mateo (22,15-22)

Naquel tempo, os fariseos fóronse reunir para veren o xeito de sorprender a Xesús nalgún dito. Así é que lle mandaron algúns discípulos deles con algúns partidarios de Herodes, que lle preguntaron:

‑ Mestre, sabemos que es sincero, que de verdade ensína‑lo camiño de Deus e que non andas con miramentos, pois non reparas na aparencia das persoas. Dinos, logo, ¿que che parece: Está permitido pagarlle o tributo ó Cesar ou non?

Xesús, que lles coñeceu a malicia, contestoulles:

‑ ¿Por que me queredes comprometer, hipócritas? Mostrádeme a moeda do tributo.

Eles presentáronlle un denario. E el preguntoulles:

‑ ¿De quen é esta imaxe e maila inscrición?

Contestáronlle:

‑ Do César.

Entón replicoulles:

‑ Pois logo dádelle ó César o que é do César, e a Deus o que é de Deus.