O til - Os escenarios da Nova Evanxelización (Pobo de Deus 661)

Seguimos vendo cales son os cambios na sociedade, na cultura e nos modos habituais de pensar de moitas persoas, coa axuda da Guía de Traballo ou, en latín, “Lineamenta” do Sínodo sobre a Nova Evanxelización. Eses cambios son os “novos escenarios” da evanxelización. No número anterior de POBO DE DEUS describimos os tres primeiros: a secularización, a globalización e os medios de comunicación.

O cuarto escenario que afecta cos seus cambios a acción evanxelizadora da Igrexa é o económico. Faltan criterios de verdadeira humanidade no funcionamento da economía no mundo enteiro. A complexidade das ligazóns económicas facilita o abuso de poder e os comportamentos máis inmorais e perniciosos.  A Igrexa, portadora da boa noticia,  sabe que lle foi confiada a defensa dos pobres, non soamente de palabra senón en accións concretas.

Preguntámonos: Son os pobres e os seus dereitos e dignidade preocupación e tarefa das nosas comunidades e asociacións?

O quinto escenario é o da investigación científica e tecnolóxica.

Vivimos nunha época na que xa perdemos o asombro ante os incesantes pprogresos neste eido. Así, a ciencia e a tecnoloxía son para moitos unha nova relixión. Espérase delas que respondan as preguntas máis fondas sobre a persoa, a verdade e o sentido da esperanza. Para moitos a ciencia é unha forma de sabedoría, capaz incluso de ofrecernos o sentido da vida.

Preguntámonos: Promovemos nos nosos ámbitos eclesiais o diálogo ciencia-fe, a formación teolóxica dos leigos?

O sexto e último escenario é o da política.  Os Lineamenta do Sínodo recoñecen que dende o Concilio Vaticano II ata hoxe os cambios políticos no mundo son sintomáticos e definidores da nosa época.

Neste escenario, existen temas e sectores que han de ser iluminados coa luz do Evanxeo: o empeño pola paz, o desenvolvemento e a liberación dos pobos; o melloramento das formas de goberno mundial e nacional; (...) a defensa dos dereitos do home e dos pobos, sobre todo das minorías; a promoción dos máis débiles; a protección da creación e o empeño polo futuro do noso planeta (Lineamenta 6).

Diante destes escenarios xorden moitas preguntas, algunha inevitable: Que debe facer a Igrexa neste mundo en cambio?

Nunha sociedade secularizada, globalizada, interconectada polos medios de comunicación, dividida economicamente entre o luxo de poucos e a miseria de moitos, seducida pola ciencia e a tecnoloxía, con novas alianzas e conflitos políticos entre as nacións, ¿cal debe ser a actitude dos cristiáns?

Na Igrexa todos debemos asumir o compromiso da nova evanxelización. ¿Como? Avivecendo a actitude profética da fe, exercendo o discernimento entre o bo, humano, valioso, verdadeiro fronte ao malo, inhumano, vil, falso

Estamos chamados –din os Lineamenta- a ser críticos cun mundo que ameaza e destrúe a dignidade das persoas, e sen descoidar ao tempo a autocrítica sobre os nosos comportamentos de crentes, na liña dunha verdadeira conversión.

Nova evanxelización significa exercer a audacia de poñer a pregunta sobre Deus no interior desta sociedade, pois niso consiste a misión dos cristiáns, da Igrexa. A Nova evanxelización esixe que nos confrontemos con estes escenarios, non pechados nas nosas comunidades e institucións, senón aceptando o desafío de entrar nas novas realidades humanas e, aí, tomar a palabra e ofrecer o noso testemuño, o evanxeo.

 A.G.V